男人的感慨｜薛可正
疫情大半年，成個香港都變天。
雖然樓市未大跌，股市又未冧，但其實有好多人，已經改變緊自己嘅生活模式。有人一個星期三日WFH，有人就就停薪留職要出去搵雜工，呢個情況比起失業有啲唔同，失業係你無咗份工，好明確地去搵一份新工就得；但好多人一個星期可能只要返三日，份工又唔算無咗，但生活開支又唔夠皮，毅然放棄又未至於，但香港呢個疫情會延續幾耐又話唔埋，好多人都係過住見步行步嘅日子。
大部份人都未遇過呢個情況，好多一家之主，好多男人就更加茫然。
屋企一個月四萬蚊開支，我朋友阿強就月入六萬五，平時俾夠四萬五老婆做家用，一個男人唔養車無不良嗜好，有時仲剩到錢買吓Figure，生活過得唔錯。
不過疫情出現後，佢公司生意直插落谷底，阿強睇住盤數一日驚過一日，公司每兩三個星期就叫佢炒一兩個人，阿強好驚，一個月萬六七數人工嘅小職員都要俾老闆炒，咁以佢份人工一個頂三個，容乜易下一個就係佢自己出信俾自己。
阿強頭嗰幾個月，每日都活喺惶恐之中。
最後老闆無炒阿強，不過阿強一個星期要放幾日無薪假，阿強明白個情況，但份人工就由六萬五變成四萬蚊多二十。阿強無同老婆講，每個月都喺自己積蓄入面用啲Figure幫補，仍然個個月四萬五蚊。
佢同老婆一直都好想生多個仔，大仔今年幼稚園，阿強成日話再唔生就兩個細唔差太遠，就喺呢段疫情期間，有一次佢老婆拉佢入房，沖完涼坐喺床話有嘢想同佢講，阿強心諗：「你唔係呢個時勢先嚟有咗呀吓？」
最後佢老婆只係問佢，可唔可以買一份貴少少嘅禮物俾阿強外母，因為六十大壽，高高興興。
阿強鬆一口氣，叫老婆隨便買，但之後佢成日都好內疚，點解自己咁無用，會驚老婆有咗BB，明明一早就係自己成日都想要。
兄弟出嚟飲酒，阿強總係唉聲嘆氣，不過其實大家都係，只不過佢唉得比較大聲。
對於阿強呢一份暫時「食之無味」嘅工，大家都無咩提議，個個月做緊郵差搵緊萬幾蚊嗰個阿連更加唔明白點解搵四萬蚊仲唔開心，男人同男人之間有時並唔係所有嘢都講得通透，出得嚟飲酒都只係想有班兄弟盲撐吓自己，有一種「我有事就有人陪」嘅存在感。
「咁你點呀？」我問阿強
「無點呀，搵錢囉。」阿強答我
「點搵呀？」
「聽講送外賣好搵。」
我望住阿強，阿強又望住我。
「送外賣喎…」我問
「你強哥月入六七皮，麾下都叫三四十人俾你差遣，宜家要去送外賣，你得架喇？」我問阿強
「我得呀，做咩唔得？」阿強答我
「俾你撞到啲朋友或者啲客咁點？」
「咩點呀？拍戲呀而家，唔通佢會好似唐心風暴咁俾說話我聽呀？唔好睇咁多戇尻劇啦。」
「我意思係，咁你個心點都會有，有少少，即係，唔係咁舒服架。」
「我無喎，我又唔係唔做份工，有咩唔舒服？同埋做男人有咩所謂，為咗個屋企唔好話送外賣，倒屎我都無所謂，只不過宜家出面環境咁差，自己又細膽，乜都驚一餐。有時望住個仔我都會覺得好內疚，想同佢出吓街都唔得，佢已經成個月無出過街。
好多時公事有變動，又唔敢同老婆講，佢成日都話可以出返嚟做嘢，只係我唔想。嫁得俾我，就想佢安安心心咁喺屋企，唔使出去受氣。」
阿強講埋呢幾句，就慢慢瞓著咗，今晚睇嚟又要送佢返屋企。其實男人就係咁複雜，彈性可以非常之大，唔信嘅你可以去睇吓啲平時懶到仆街嘅男人，做咗老豆之後有幾勤力就知。
一個家係可以俾到男人好多力量，叫佢做咩都可以，只不過平時有啲小煩惱小感慨，總係唔可以同身邊最愛嘅人去講清楚，因為出自愛，呢一種矛盾，永遠都只可以搵幾個兄弟出嚟飲幾杯屎水先可以解決到。
最後當然要戴返個頭盔，我並唔係覺得外賣係一份好低下嘅工作，我當時只係指阿強本身工作同外賣呢份工作的確係有落差。家陣外賣員時薪以百元計算，呢個收入比起好多初入行嘅律師都仲要高，我都打算去做埋一份，包有伙食。
____________________________________________________________
薛可正TBC文章收費平台《榕樹頭唔斷氣》現已推出
隨意門：https://pr7d8.app.goo.gl/GSAM
每周定時更新文章，
九月推出全新連載故事，
文字有價，多多支持。
文章列表：
1.「我的成長地」〈免費〉
2.「置樂」 〈收費〉
3.「1991年9月1」 〈收費〉
4.「隆重冷氣儀式」〈收費〉
5.「三聖神石」 〈收費〉
查詢網址：tbcstory.com
*******************************************************
IG：sithoching
Page：薛可正
Search